Nalunaarsuutit tunngaviusut aamma periaaseq
Piffissami 2016-2021-mut kisitsisitigut paasissutissani nalunaarsuutit atorneqartut pisortat ataatsimoortumik akissarsianut nalunaarsuiffianeersuupput. 2016 sioqqullugu kommunit ataatsimoorlutik allaffissornikkut Winformatik atorlugu nalunaarsuutaanneersut atorneqarput.
Pineqartut allaffissorluni aqutsinermi nalunaarsuiffinninngaanneerput naatsorsueqqissaarnikkut atungassatut ineriartortitaanatik, taamaattumillu nalunaarsuutit tunngaviusut suliareqqillugit nalilersorlugillu suliaapput. Akissarsianut nalunaarsuiffik atorlugu piffissat aaqqissuunneqarnerat Winformatikimit allernermit pitsaaneruvoq. 2016-imi akiliutigineqarsimasut ukiorlu taanna Akileraartarnermut Aqutsisoqarfimmut nalunaarutigineqarsimasut taamaallaat ilanngunneqarsinnaapput (ukiup siulianut iluarsiissutit ilanngunneqarnatik). 2016 sioqqullugu nalunaarsukkat annertunerusumik iluarsaanneqarsinnaanngillat.
Akissarsianut nalunaarsuiffimmit paasissutissat Naatsorsueqqissaartarfiup inuit pillugit nalunaarsuutaanik tapilerlugit suliarineqarput.
Inuit amerlassusaannik killiliineq
Naatsorsuutini pineqartut tassaapput Naatsorsueqqissaartarfiup inunnik nalunaarsuiffiani inuit ukiup naanerani Kalaallit Nunaanni kommunini najugaqartutut allattorsimasut. Inuit allattorsimaffianni soraarnerussutisialik sumiiffimmi najugaqartutut allaqqasoq tassani najugaqartutut naatsorsuussaavoq, inuillu allattorsimaffianni sumiiffimmi najugaqartutut naatsorsorneqarsimaneq kommunit naatsorsuuserisarfianni allami najugaqartutut allaqqasinnaalluni.
Ukiut
Ukiumi kisitsiviusumi novembarip naanerani ukiorisat malinneqarput. Utoqqalinermi soraarnerussutisiat qaammatip 67-inik ukioqalerfiup tulliani tunniunneqarsinnaapput. Taamaasilluni novembarip naanerani 66-inik ukioqalersimasut tamarmik utoqqalinermi soraarnerussutisiaqalernissamut decembarimi qinnuteqarsinnaapput.
Kommunit najugaqarfiillu
Januaarip aallaqqaataat 2009 aallarnerfigalugu kommunit 18-iusimasut kommunerujussuarnut sisamanut katiterneqarput, 2018-imilu januaarip aallaqqaataani Qaasuitsup Kommunia aamma Kommune Qeqertalimmut kiisalu Avannaata Kommunianut avinneqarluni. Saqqummersitami matumani 2021-mi decembarimi kommunit avinneqarneri nutaat malinneqarput, kommuniusimasulli kommunini nutaani najugaqarfittut atorneqarput. Saqqummersitamilu kommuninut immikkoortiterinerni massakkut kommunit avinneqarneri pineqarput, najugaqarfinnullu immikkoortiterinerni 2009 sioqqullugu kommunit pineqarlutik. Immikkoortiterinerit marluk ataani takussutissiami takuneqarsinnaapput.
Tabel 1. Kommunit najugaqarfiillu
|
Kommuni |
Kommune Kujalleq |
Kommuneqarfik Sermersooq |
Qeqqata Kommunia |
Kommune Qeqertalik |
Avannaata Kommunia |
|
Distrikti |
Nanortalik |
Ivittuut |
Maniitsoq |
Kangaatsiaq |
Ilulissat |
|
|
Qaqortoq |
Paamiut |
Sisimiut |
Aasiaat |
Uummannaq |
|
|
Narsaq |
Nuuk |
|
Qasigiannguit |
Upernavik |
|
|
|
Tasiilaq |
|
Qeqertarsuaq |
Qaanaaq |
|
|
|
Ittoqqortoormiit |
|
|
|
Ilaqutariit
Soraarnerussutisianut akiliisarnerit Naatsorsueqqissaartarfiup ilaqutariinnut nalunaarsuutaanik taperlugit suliarineqarput. Ilaqutariit pillugit kisitsisitigut paasissutissat atorlugit takuneqarsinnaavoq soraarnerussutisialik kisimiittuunersoq imaluunniit aappaqarnersoq. Aapparnermut paasissutissat kommunit soraarnerussutisiaqarnissamut paasissutissaataanut tunngaviusuniit allaannerusinnaapput.
Utoqqalinersiallit ulloq unnuarlu paaqqinnittarfinni najugaqartut aningaasarsianut nalunaarsuutini nalunaarutigineqarsimapput.
2018 sioqqullugu naatsorsuutit
Pisortanit soraarnerussutisiat 2018 sioqqullugu pillugit naatsorsuutit Naatsorsueqqissaartarfiup kisitsisaataasiviani (bank.stat.gl) pissarsiarineqarsinnaapput. Kisitsisaataasivimmi kisitsisitigut paasissutissanik nammineq toqqartukkanik aallertoqarsinnaavoq, tassani najugaq, ikiorsiissutit suussusaa, ukiut, suiaassuseq, ukioq kiisalu soraarnerussutisiat annertussusaat katiternissaannut periarfissaqarpoq.